ឆាត្រពាំងកំប៉ុងថ្លើមជ្រូក
គ្រឿងផ្សំ៖ ត្រពាំងកំប៉ុង១កំប៉ុង ថ្លើមជ្រូក ខ្ទឹមសចិញ្ច្រាំ ស្ករស ទឹកត្រី ម្រេច អំបិល ប្រេងខ្យង
របៀបធ្វើ៖
- ស្ងោរថ្លើមជ្រូកអោយឆ្អិន រួចហាន់ជាបន្ទះៗ។
- បំពងខ្ទឹមស រួចដាក់ថ្លើមជ្រូកដែលហាន់ហើយចូល បន្ទាប់មកចាក់ត្រពាំងកំប៉ុងចូល។ ឆាច្របល់គ្នា ដោយដាក់ស្ករស ទឹកត្រី ម្រេច អំបិល ប្រេងខ្យងតាមរសជាតិដែលចូលចិត្ត។
- គ្រប់រយៈពេល២នាទីទុកជាការស្រេច (ត្រពាំងកំប៉ុងផុយស្រាប់មិនចាំបាច់រំងាស់ទេ)៕
ខ្ញុំធ្លាប់ត្រូវបានគ្រូពេទ្យជំរុញអោយធ្វើការរំលូតកូន
អត្ថបទនេះមិនមែនជាការវាយប្រហារដល់គ្រូពេទ្យដែលមានក្រមសីលធម៌វីជ្ជាជីវៈត្រឹមត្រូវនោះទេ។ នេះជាបទពិសោធផ្ទាល់របស់ខ្ញុំមួយដែលខ្ញុំចង់ចែករំលែកជូនស្ត្រីទាំងអស់ដែលមានគត៌ ទុកជាការពិចារណាមុននឹងធ្វើការសំរេចចិត្តអ្វីមួយទាក់ទងទៅនឹងគត៌របស់ខ្លួន។
ក្រោយពីរៀបការបាន៧ខែ ខ្ញុំនិងស្វាមីសំរេចចិត្តមានកូនដំបូង។ខ្ញុំជាស្ត្រីដែលមានរដូវមិនទៀងទាត់។ ខ្ញុំក៏បានប្រើឧបករណ៍ពិនិត្យទឹកនោមរៀងរាល់១អាទិត្យម្តងដើម្បី អោយដឹងថាមានផ្ទៃពោះរឺនៅ។ ក្រោយមកប្រហែលជា១ខែ ខ្ញុំក៏មានផ្ទៃពោះមែន។ តែខ្ញុំប្រាកដថាគត៌នោះអាយុមិនលើសពី១ខែទេ។ ខ្ញុំក៏ទៅពេទ្យ (កាល់ម៉ែត) នៅថ្ងៃទី២កុម្ភៈ២០០៧។ ដោយបំណងចង់បានដំបូន្មានពីគ្រូពេទ្យអំពីវិធីរក្សាគត៌។ អ្នកគ្រូពេទ្យម្នាក់នោះសួរពីរដូវចុងក្រោយរបស់ខ្ញុំ។ ខ្ញុំថារដូវចុងក្រោយរបស់ខ្ញុំអស់តាំងពីថ្ងៃទី២៥តុលា២០០៦ មកម៉្លេះ ហើយខ្ញុំបានប្រាប់គាត់ពីការពិនិត្យទឹកនោមដើម្បីអោយដឹងថាមានផ្ទៃពោះនេះ។ តែគាត់ដូចជាមិនរវល់ស្តាប់សោះ គាត់គិតតែផ្ទៀងផ្ទាត់តារាងគត៌។ គាត់និយាយថាគត៌នេះ អាយុជាង៣ខែហើយម៉េចក៏ពោះមិនទាន់ខ្ទៀតទៀត? ហើយក៏អោយខ្ញុំទៅពិនិត្យអេកូ។ ពេលឃើញលទ្ធផល គាត់ថាកូនខ្ញុំជាប្រភេទកូនពង មិនលូតលាស់ត្រូវប្រញ៉ាប់យកចេញ ហើយគាត់ក៏អោយលេខទូរស័ព្ទទាក់ទងដើម្បីរំលូតកូននោះ។ ឥឡួវកូនខ្ញុំមានអាយុ១ឆ្នាំ២១ខែហើយ នាងមានសុខភាពល្អណាស់។ ហេតុអ្វីបានជា អ្នកគ្រូពេទ្យម្នាក់នោះហ៊ានសន្និដ្ឋានបែបនេះ គ្រាន់តែពិនិត្យលើកទី១សោះ ដោយមិនតាមដានអោយបានច្បាស់លាស់សិន?
កូនស្រីខ្ញុំ ដាលីណាពេលបច្ចុប្បន្ន
រំលូតកូន
បើនិយាយពីការរំលូតកូន គឺមិនមានមាត្រាណាមួយនៅក្នុងច្បាប់បានចែងថាជាការខុសច្បាប់ នោះទេនៅប្រទេសកម្ពុជា។ ជាការពិតណាស់ អ្វីដែលច្បាប់មិនបានចែងគឺមានន័យថា ពលរដ្ឋអាចធ្វើបានគឺគ្មានច្បាប់ឬក៏នរណាមកដាក់ទោសអូសដំណើរនោះ ឡើយ។
តែបើនិយាយពីធម៌ព្រះវិញ ព្រះពុទ្ធលោកបានផ្ដល់ឱវាទថា កុំសម្លាប់ជីវិត ព្រោះវាជាអំពើបាប។ ចំណែកឯសាសនាដទៃទៀតក៏មិនខុសពីសាសនាព្រះពុទ្ធប៉ុន្មានដែរ។ ពួកអ្នកកាន់សាសនាកាតូលិក និងសាសនាគ្រឹស្តភាគច្រើនក៏បានចាត់ទុកថា ការរំលូតកូន ឬក៏ការទប់ស្កាត់មិនឲ្យមានកូននោះគឺជាការបំផ្លាញជីវិតមនុស្ស។ ពួកគេបានតវ៉ាថា អំពើបែបនេះត្រូវតែហាមឃាត់។ ពួកអ្នកទាំងនោះគិតថា ជីវិតមនុស្សគឺព្រះជាអ្នកប្រទាន ហេតុនេះ បើបំផ្លាញជីវិតមនុស្សគឺជាការប្រឆាំងនឹងព្រះដែលជាអំពើបាប ហើយព្រះមិនប្រទានពរឡើយ។ អានបន្ថែម »
អាកាសចរណ៍ស៊ីវិលកម្ពុជា ដាក់ចេញវិធានការទប់ស្កាត់ជំងឺផ្ដាសាយ A/H1N1 តាមច្រកព្រលានយន្ដហោះ
យោងតាមសេចក្ដីជូនដំណឹងពីរដ្ឋលេខាធិការដ្ឋានអាកាសចរណ៍ស៊ីវិល កាលពីថ្ងៃម្សិលមិញបាននិយាយថា ស្ថានភាពមួយបានដាក់ចេញនូវវិធានការ ដើម្បីទប់ទល់ការរីកដុះដាលនៃជំងឺផ្ដាសាយ A/H1N1 តាមច្រកទ្វារអាកាសយានដ្ឋានអន្តរជាតិ។
ក្នុងលិខិតជូនដំណឹងដែលចុះហត្ថលេខាដោយលោក ម៉ៅ ហាវណ្ណាល់ រដ្ឋលេខាធិការនៃរដ្ឋលេខាធិការដ្ឋានអាកាសចរណ៍ស៊ីវិល បានដាក់ចេញនូវវិធានការដូចតទៅ៖
១- គ្រប់អាកាសយានដ្ឋានអន្តរជាតិ «ក្រុមហ៊ុនសម្បទានយន្តហោះ ត្រូវធ្វើផែនការរួមដើម្បីសហប្រតិបត្តិការ នៅពេលជួបជំងឺផ្ដាសាយជ្រូក»។ អានបន្ថែម »
ក្រសួងអប់រំកាត់បន្ថយមុខវិជ្ជាខ្លះដែលមិនចាំបាច់
ភ្នំពេញ៖ ក្រុមមន្ត្រីអប់រំបាននិយាយថា ចាប់ពីឆ្នាំសិក្សា២០០៩-២០១០ ខាងមុខនេះទៅ ក្រសួងនឹងដាក់នូវកម្មវិធីសិក្សាលើមុខវិជ្ជាតម្រងទិសសម្រាប់ សិស្សានុសិស្សថ្នាក់ទី១១ និង១២។
លោក ច្រឹង លឹមស្រ៊ី ប្រធាននាយកដ្ឋានមធ្យមសិក្សាចំណេះទូទៅ បានមានប្រសាសន៍ថា «កម្មវិធីសិក្សាថ្មីនេះនឹងអនុញ្ញាតឲ្យថ្នាក់ទី១១ និងថ្នាក់ទី១២រើសនូវមុខវិជ្ជាអ្វីដែលពួកគេគិតថារៀនពូកែ»។ លោកបន្តថា «កម្មវិធីសិក្សាថ្មីនេះគឺដើម្បីកាត់បន្ថយមុខវិជ្ជាខ្លះដែលមិន ចាំបាច់រៀន សម្រាប់សិស្សានុសិស្សដែលពួកគេមិនអាចយកទៅប្រើប្រាស់បាន»។
កម្មវិធីនេះត្រូវបែងចែកជា២ ផ្នែក គឺគណិតវិទ្យាកម្រិតមូលដ្ឋាន រួមមានសិស្សត្រូវរៀនគណិតវិទ្យារយៈពេល៤ម៉ោង អក្សរសាស្ត្រខ្មែរ៦ម៉ោងភាសាបរទេសបារាំង ឬអង់គ្លេស៤ម៉ោងអប់រំកាយកីឡា និងសុខភាពរយៈពេល២ក្នុងមួយសប្ដាហ៍ និងរើសមុខវិជ្ជាជម្រើស៤មុខទៀតក្នុងចំណោមមុខវិជ្ជាជម្រើសចំនួន ១៣។ លោកច្រឹង លឹមស្រ៊ីបញ្ជាក់។ អានបន្ថែម »
មិនចេះផឹកស្រាមិនមែនជាបុរសពេញលក្ខណៈរឺ?
នៅស្រុកយើងពេលប្រុសៗបានអង្គុយតុជុំគ្នា អ្វីដែលចាំបាច់មិនអាចអត់បានគឺជល់កែវគ្នា។ នៅគ្រប់កម្មវីធីទាំងអស់ មិនថាមង្គលការ ឡើងផ្ទះ ខួបកំណើត ភ្ជាប់ពាក្យ… សូម្បីតែបុណ្យសពក៏ជល់កែវគ្នាដែរ។ អ្វីដែលគួរអោយទើសចិត្តបំផុតនោះ គឺមានអ្នកមេខ្យល់ទៀតពេលស៊ីផឹកនោះ! គឺអ្នកដើរនាំគេគោះកែវ អ្នកចាក់ស្រាអោយ អ្នកដាក់លក្ខខណ្ទ (លើកដាច់ រឺ ចាក់អោយពេញកែវមិនដាក់ទឹកកក…)។ ហើយមានអ្នកខ្លះពេលគេមិនគោះកែវជាមួយតាំងនិយាយថា “ ប្រុសរឺមិនមែន?” រឺក៏ថា “ ខ្លាចប្រពន្ធម៉្លេះ!!” រឺបើឃើញប្រពន្ធអង្គុយក្បែរក៏ថា “ បើកសិទ្ធិអោយគ្នាខ្លះទៅ!!” … ស្តាប់ទៅដូចជាយ៉ាងម៉េចមិនដឹងទេ! សួរ ថា តើពេលស្រវឹងស្រាជោគជាំទៅចំណេញអ្វីខ្លះ? ដូចជាមិនមានចំណេញទេមើលទៅ!។ ហើយតើអ្នកណាដែលរងការលំបាកជាមួយយើង? ប្រហែលជាមិនមែនអ្នកនាំគោះកែវទាំងនោះទេ។ ច្បាស់ជាសាច់ញាតិ ប្រពន្ធកូននេះឯងជាអ្នកពិបាកជាមួយ។ ប្រសិនបើយើងចូលចិត្តផឹកស្រាច្រើន គួរតែផឹកតែឯងទៅ មិនគួរមកបង្ខំអ្នកដទៃទេ។ តែពេលខ្លះប្រុសៗគេនិយាយថាបើមិនគោះកែវមិនសូវជិតស្និទ្ធនឹងគ្នា រឺ ក៏ជជែកការងារមិនងាយត្រូវគ្នាទេ!! មែនទេ?
ទៅលេងមហាសមុទ្រអាត្លង់ទិច – La Baule-Escoublac
La Baule-Escoublac រឺហៅកាត់ថាឡាបូល(La Baule) ជាកន្លែងកំសាន្តមាត់សមុទ្រដែលមានឆ្នេរខ្សាច់វែងជាងគេនៅអឺរ៉ុប ប្រវែង១២គីឡូម៉ែត្រ។ កាលពីថ្ងៃអាទិត្យ នាំគ្នាទៅលេងទីនោះព្រោះអាកាសធាតុល្អមែនទែន…ចង់ល្អជ្រុល! 
ក្តៅណាស់ម្ចាស់ថ្លៃអ្ហើយ! មេឃក្តៅប៉ុណ្ណឹងហើយ តែទឹកសមុទ្រនៅតែត្រជាក់ដូចទឹកកកអីចឹង! តែសប្បាយគួរសមដែរ ញ៉ាំបាយហើយនាំគ្នាដើរលេងតាមឆ្នេរទាំងកណ្តាលថ្ងៃត្រង់ជាក់ ហេ ហេ….នៅតែបន្តិចទៀតច្បាស់ជាក្រៀមដូចត្រីងៀតមិនខាន។
ពួកបារាំងចំលែកចិត្តមិនស្ទើរទេមើលទៅព្រោះមិនដែលឃើញអ្នកទៅលេងមាត់សមុទ្រស្លៀកខោខូវប៊យជើងវែង ហើយពាក់អាវដៃវែងទៀត។ ជួយមិនបានទេក្តៅចង់ខ្លោចយ៉ាងនេះ!
រឿងនិទានមួយ
រឿងនិទានអំពីប្តីប្រពន្ធ២នាក់។ ថ្ងៃមួយបុរសជាប្តីបានទទួលសំបុត្រអញ្ជើញចូលរួមក្នុងកម្មវិធីមួយជាមួយភរិយា។ បុរសនោះសប្បាយចិត្តណាស់ព្រោះតាំងពីរៀបការមកមិនដែលមានឱកាសទៅណាជាមួយភរិយាសោះ។ តែនាងជាប្រពន្ធមិនសូវសប្បាយចិត្តទេ។ នាងគិតថាបើខ្លួនក្រដូច្នេះធ្វើម្តេចនឹងមានគ្រឿងអលង្កាពាក់បានសមរម្យនឹងគេ? ប្តីឃើញប្រពន្ធពិបាកចិត្តដូច្នោះ ក៏យកប្រាក់ដែលគាត់សន្សំទុកទិញកាំភ្លើងបាញ់សត្វអោយប្រពន្ធទៅទិញខ្សែក។ នាងប្រពន្ធយកប្រាក់នោះទៅទិញបានខ្សែកមាសមួយខ្សែតូច តែនាងមិនពេញចិត្តសោះ។ នាងមានមិត្តភក្តិម្នាក់ជាអ្នកមានស្តុកស្តម្ភណាស់។ ក៏សំរេចចិត្តទៅខ្ចីគ្រឿងអលង្កាមិត្តនាង។ មិត្តនាងបានអោយនាងខ្ចីតាមបំណងមែន។ គេបានអោយនាងជ្រើសរើសគ្រឿងអលង្កាដ៏សំបូរបែបរបស់គេ។ នាងរើសបានខ្សែកមួយខ្សែយ៉ាងស្អាត។ ពេលនាងពាក់ចូលរួមក្នុងកម្មវិធីនោះជាមួយប្តីនាង អ្នកណាក៏សរសើថាខ្សែកនាងស្អាតដែរ។ នាងពិតជាសប្បាយចិត្តណាស់។ តែពេលត្រលប់មកផ្ទះវិញស្រាប់តែបាត់ខ្សែកនោះ។ នាងនិងប្តីពិបាកចិត្តយ៉ាងខ្លាំង ហើយក៏សំរេចចិត្តទៅទិញខ្សែកនោះសងមិត្តនាងវិញ។ ពួកគេរកទិញបាន ខ្សែកដែលប្រហាក់ប្រហែលនឹងខ្សែកដែលបាត់តែតំលៃរបស់វារាប់ពាន់ឯណោះ។ ទោះជាយ៉ាងណាក៏ពួកគេសំរេចចិត្តទិញដែរ។ នាងជំពាក់បំនុលគេយ៉ាងច្រើនព្រោះតែខ្សែកនេះ។ នាងក៏បានយកខ្សែកទៅសងមិត្តនាងវិញ។ មិត្តភក្តិនាងមិនបានបើកមើលខ្សែកនោះទេ ក៏យកវាទៅទុកតាមកន្លែងដើមវិញ។ និយាយពីនាងដែលខ្ចីខ្សែកនោះ ខំប្រឹងរកប្រាក់សងបំណុលគេជិត១០ឆ្នាំទើបរួច។ ពេលសងបំណុលគេអស់ នាងក៏សំរេចចិត្តនិយាយការពិតប្រាប់មិត្តនាង។ មិត្តនាងអាណិតនាងយ៉ាងខ្លាំង ព្រោះខ្សែកនោះមិនមានតំលៃដល់ម្លឹងឡើយ។ ខ្សែកនោះតំលៃតែប៉ុន្មានរយប៉ុណ្ណោះ។
នេះជារឿងនិទានពេលបាយថ្ងៃត្រង់ម្សិលមិញ…
សំរាប់គំរោងទឹកស្អាតនៅកម្ពុជា។
